దక్షిణాఫ్రికాను వణికించిన బౌలర్లు.. రెండు రోజుల్లోనే టెస్టు గెలిచిన ఆస్ట్రేలియా

తొలి రోజు 15 వికెట్లు, రెండో రోజు 9 వికెట్లు. ఇలా బౌలర్ల హవా నడిచిన టెస్టు మ్యాచ్ లో దక్షిణాఫ్రికాపై ఆతిథ్య ఆస్ట్రేలియా ఘన విజయం సాధించింది. రెండు రోజుల్లోనే ముగిసిన ఈ మ్యాచ్ లో 6 వికెట్ల తేడాతో దక్షిణాఫ్రికా జట్టును ఓడించింది. ఓవర్ నైట్ స్కోరు 145/5 తో రెండో రోజు, ఆదివారం తొలి ఇన్నింగ్స్ కొనసాగించిన ఆస్ట్రేలియా 218 పరుగుల వద్ద ఆలౌటైంది. ట్రావిస్ హెడ్ (92) టాప్ స్కోరర్ గా నిలిచాడు. స్టీవ్ స్మిత్ (36), అలెక్స్ కారీ (22) ఫర్వాలేదనిపించారు. సఫారీ బౌలర్లలో కగిసో రబాడ నాలుగు, మార్కో జాన్సెన్ మూడు వికెట్లతో సత్తా చాటారు. అనంతరం 70 పరుగుల లోటు స్కోరుతో రెండో ఇన్నింగ్స్ కు వచ్చిన దక్షిణాఫ్రికా 37.4 ఓవర్లలో 99 పరుగులకే కుప్పకూలింది. 

ఆసీస్ కు కేవలం 34 పరుగుల లక్ష్యం ఇచ్చింది. ప్యాట్ కమిన్స్ ఐదు వికెట్లతో చెలరేగగా, స్కాట్ బోలాండ్, మిచెల్ స్టార్క్ చెరో రెండు వికెట్లు పడగొట్టారు. వీరి దెబ్బకు సఫారీ జట్టులో ఎనిమిది మంది సింగిల్ డిజిట్ కే వెనుదిరిగారు. ఖయా జోండో (36), టెంబా బవూమ (29) రాణించారు. 34 పరుగుల లక్ష్యాన్ని ఆస్ట్రేలియా 7.5 ఓవర్లలో 4 వికెట్లు కోల్పోయి ఛేదించింది. కగిసో రబాడ నాలుగు వికెట్లతో చెలరేగడంతో ఆసీస్ బ్యాటర్లు సైతం పెవిలియన్ కు క్యూ కట్టారు. ఖవాజా (2), వార్నర్ (3), స్మిత్ (6), హెడ్ (0) వరుసగా ఔటయ్యారు. అయితే, ఎక్స్ ట్రాల రూపంలోనే 19 పరుగులు రావడంతో ఆసీస్ గెలిచింది.